Til Miljøavdelinga v/Finnmark og Troms Fylke:

Lomvi-alarm på Hornøya. Vardø, 4. oktober 2020

Kring 1848 vart dei siste observasjonane av geirfugl gjort på Grønland og kring Vardø. Geirfuglen vart som kjent utrydda. Historia er i ferd med å gjenta seg. No i 2020 slår Vardø alarm for lomvien. Men Miljø-direktoratet har visst ikkje oppfatta samanhengen.

Norge har deltatt i overvåking av bestandar av sjøfugl etter internasjonale metodar (Seapop m.m.) i over 30 år. Det er visst nedgang for mange artar. (Men statistikken er for fagfolk.) Klimaendringar, rovfugl og næring (olje) m.m. påvirkar levemåten for sjøfugl, – alt etter dei spesifikke krav som kvar enkelt art har. Lomvien er ein alkefugl som hekker opent på berghyller og er sårbar for ørn, ravn og kråke. Siste 2 årshekking har omtrent ikkje gitt overlevande rekruttering av lomvi på Hornøya!

Havørna var ut-ryddings-trua for 50 år sidan, – den vart freda i 1968 og bestanden har tatt seg kraftig opp. For Hornøya sitt vedkomande har havørna pluss ravn og kråke gått i kompaniskap for store innhogg i bestanden av lomvi. Dette strategien kan effektivt reduserast ved aktivt oppsyn/betalande besøk på Hornøya. Vardø kommune har i lengre tid signalisert ei sørgeleg utvikling av fuglane på Hornøya.

Desverre er Miljødirektoratet si oppskrift for fuglefjellet på Hornøya «redusert ferdsel». Og trass i rapportar frå Vardø om ørna sitt samspel med kråke og ravn om å ta lomviane, ser det ut til at lomvien no skal ofrast for ein fugl som for lengst er ute av Rødlista! Det er rystande at Miljø-direktoratet ikkje vil forvalte havørn-bestanden fordi den framleis «er freda» etter 52 år! Fylkesmannen sine «begrensede muligheter » er ei byråkratisk sovepute!

Status for 2015: Lomvi er vurdert til kategorien «kritisk truet» på Norsk Rødliste. Fylkesmannen må vakne no!

Thor Warberg (Hornøy-entusiast og Vardø-venn)